Prentsa hidrauliko

Prentsa hidraulikoa azalera desberdineko bi zilindroz osatutako tresna da, fluido batez betea, eta Pascalen printzipioaren arabera diharduena. Fluidoa eremu mugatu batean ezarrita dagoenez gero, zilindroei indarra eragiten bazaie, presioa era berean iristen da eremuaren puntu guztietaraino. Beraz, zilindro txikian indarra aplikatzen bada, askoz indar handiagoa eragiten da zilindro handian. Gauzei forma emateko eta edozein osagaizko objektuak (altzairua, kautxua, plastikoak) estutzeko erabiltzen da.

Indarren arteko erlazioa

Prentsa hidraulikoaren eskema

$A_1$ azalera duen enbolo txikian $F_1$ indarra aplikatzen bada, $p_1$ presioa sortzen da:

$p_1=\frac{F_1}{A_1}$

Era berean, bigarren enboloan:

$p_2=\frac{F_2}{A_2}$

Fluidoa komunikaturik dagoenez gero, Pascalen printzipioaren arabera, bi pistonetan presio berdina izanen da, sakonera berean daudelako. Beraz:

$p_1=p_2$

Hots:

$\frac{F_1}{A_1}=\frac{F_2}{A_2}$ eta indarren arteko erlazioa: $\frac{F_1}{F_2}=\frac{A_1}{A_2}$

Beraz, prentsa hidraulikoko indar erresultantea:

$F_2=F_1\frac{A_2}{A_1}$

$F_1$ = enbolo txikiko indarra newtonetan.

$F_2$ = enbolo handiko indarra newtonetan.

$A_1$ = enbolo txikiko azalera metro koadrotan.

$A_2$ = enbolo handiko azalera metro koadrotan.